ಕರಾಟೆ ತರಬೇತಿಯ ಮಧ್ಯೆ ಆರನೇ ತರಗತಿ ವಿದ್ಯಾರ್ಥಿನಿ ಕುಸಿದು ಬಿದ್ದು ಮೃತ್ಯು

 ಕರಾಟೆ ತರಬೇತಿಯ ಮಧ್ಯೆ ಆರನೇ ತರಗತಿ ವಿದ್ಯಾರ್ಥಿನಿ ಕುಸಿದು ಬಿದ್ದು ಮೃತಪಟ್ಟ ಘಟನೆ ನಡೆದಿದೆ.

ಕೊಟ್ಟಾರಕ್ಕರ ವಾಳಕಂ ತೆಕ್ಕೆಯಂಬಲಕ್ಕರ ಪುತ್ತನ್ ವೀಟ್ಟಿಲ್ ಬಿನೋಯ್ ಮತ್ತು ಸಿಮಿ ದಂಪತಿಯ ಪುತ್ರಿ ಅಹನ್ನ ಬಿನೋಯ್ (11) ಮೃತಪಟ್ಟ ಬಾಲಕಿ. ಈಕೆ ವಾಳಕಂ ಕಾಂಪಸ್ ಗ್ಲೋಬಲ್ ಸ್ಕೂಲ್‌ನ ವಿದ್ಯಾರ್ಥಿನಿಯಾಗಿದ್ದಳು. ಅಂಚಲ್‌ನಲ್ಲಿರುವ ಕರಾಟೆ ತರಬೇತಿ ಕೇಂದ್ರದಲ್ಲಿ ನಿನ್ನೆ ಅಭ್ಯಾಸ ಮಾಡುತ್ತಿದ್ದ ವೇಳೆ ಈ ದುರ್ಘಟನೆ ಸಂಭವಿಸಿದೆ.

ಬಾಲಕಿ ಕುಸಿದು ಬಿದ್ದ ತಕ್ಷಣವೇ ಆಕೆಯನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ ಜೀವ ಉಳಿಸಲು ಸಾಧ್ಯವಾಗಲಿಲ್ಲ. ಘಟನೆಯ ವೇಳೆ ಅಹನ್ನಾಳ ತಾಯಿ ಕೂಡ ಜೊತೆಯಲ್ಲಿದ್ದರು ಎನ್ನಲಾಗಿದೆ. ಬಾಲಕಿಯ ಅನಿರೀಕ್ಷಿತ ಸಾವಿನಿಂದ ಕುಟುಂಬಸ್ಥರು ಮತ್ತು ಸ್ಥಳೀಯರು ಬೆಚ್ಚಿಬಿದ್ದಿದ್ದಾರೆ. ಮರಣೋತ್ತರ ಪರೀಕ್ಷೆಯ ವರದಿ ಬಂದ ನಂತರವಷ್ಟೇ ಸಾವಿಗೆ ನಿಖರ ಕಾರಣ ತಿಳಿಯಲಿದೆ.