ನೀರ್ಚಾಲು ಪರಿಸರದಲ್ಲಿ ಬೀದಿ ನಾಯಿಗಳ ಹಾವಳಿ; ಮಹಿಳೆಗೆ ಗಾಯ

 ನೀರ್ಚಾಲು: ಬೀದಿ ನಾಯಿಗಳ ಕಾಟ ತೀವ್ರಗೊಂಡಿದ್ದು, ನಾಯಿ ಕಚ್ಚಿ ಗೃಹಿಣಿಯೊಬ್ಬರು ಗಾಯಗೊಂಡಿದ್ದಾರೆ. ಪುದುಕೋಳಿಯ ದಿವಂಗತ ರಾಮ ಚೆಟ್ಟಿಯಾರ್  ಅವರ ಪತ್ನಿ ನಾರಾಯಣಿಯಮ್ಮ (85) ನಾಯಿ ಕಡಿತಕ್ಕೆ ಒಳಗಾದವರು. ನಿನ್ನೆ (ಶುಕ್ರವಾರ) ಸಂಜೆ ಈ ಘಟನೆ ನಡೆದಿದೆ. ಮನೆಯೊಳಗೆ ವಿಶ್ರಾಂತಿ ಪಡೆಯುತ್ತಿದ್ದ ನಾರಾಯಣಿಯಮ್ಮ ಅವರ ಬಳಿಗೆ ಓಡಿ ಬಂದ ನಾಯಿ, ಒಳಗೆ ನುಗ್ಗಿ ದಾಳಿ ನಡೆಸಿದೆ. ಅವರ ಕೈಗೆ ಮತ್ತು ಭುಜಕ್ಕೆ ಗಾಯಗಳಾಗಿವೆ. ಅವರು ಕೈಯಲ್ಲಿ ಧರಿಸಿದ್ದ ಚಿನ್ನದ ಬಳೆಯನ್ನು ನಾಯಿ ಕಚ್ಚಿ ಮುರಿದಿದೆ. ಗಾಯಗೊಂಡ ನಾರಾಯಣಿಯಮ್ಮ ಅವರು ಕಾಸರಗೋಡು ಜನರಲ್ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ.

ಇದಲ್ಲದೆ ಹಲವಾರು ಸಾಕುಪ್ರಾಣಿಗಳನ್ನೂ ನಾಯಿ ಕಚ್ಚಿದೆ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಮಲ್ಲಡ್ಕ, ಕೊರಗಂತೊಟ್ಟಿ, ಏಣಿಯರ್ಪು, ಬಿರ್ಮ್ಮಿನಡ್ಕ, ಚಿಮ್ಮಿನಡ್ಕ ಸಹಿತ ವಿವಿಧ ಭಾಗಗಳಲ್ಲಿ ಬೀದಿ ನಾಯಿಗಳ ಹಾವಳಿ ತೀವ್ರವಾಗುತ್ತಿದ್ದರೂ, ಇದರ ವಿರುದ್ಧ ಕ್ರಮ ಕೈಗೊಳ್ಳಲು ಸಂಬಂಧಪಟ್ಟ ಅಧಿಕಾರಿಗಳ ಕಡೆಯಿಂದ ಯಾವುದೇ ಕ್ರಮ ಜರುಗುತ್ತಿಲ್ಲ ಎಂಬ ದೂರು ಕೇಳಿಬಂದಿದೆ.