ಬದಿಯಡ್ಕ: ಕುಂಬಳೆ-ಮುಳ್ಳೇರಿಯ ಕೆಎಸ್ಟಿಪಿ ರಸ್ತೆಯ ಪೆರಡಾಲ ಸೇತುವೆಯ ಸಮೀಪ ರಸ್ತೆಯ ಬದಿ ಕುಸಿದು ವಾಹನ ಸವಾರರು ಹಾಗೂ ಸಾರ್ವಜನಿಕರು ಎದುರಿಸುತ್ತಿದ್ದ ಗಂಭೀರ ಸಮಸ್ಯೆಗೆ ವಿಜಯ ಕರ್ನಾಟಕ ಪತ್ರಿಕೆಯ ವರದಿಯು ಸೂಕ್ತ ಫಲಶ್ರುತಿ (ಬದಲಾವಣೆ) ತಂದುಕೊಟ್ಟಿದೆ. ಮಾಧ್ಯಮಗಳು ಸಾರ್ವಜನಿಕರ ಧ್ವನಿಯಾಗಿ ಕೆಲಸ ಮಾಡಿದಾಗ ಆಡಳಿತ ವ್ಯವಸ್ಥೆ ಹೇಗೆ ಎಚ್ಚೆತ್ತುಕೊಳ್ಳುತ್ತದೆ ಎಂಬುದಕ್ಕೆ ಈ ಘಟನೆ ಒಂದು ಉತ್ತಮ ಉದಾಹರಣೆಯಾಗಿದೆ. ಇದರ ಸಂಪೂರ್ಣ ಫಲಶ್ರುತಿ ವರದಿ ಇಲ್ಲಿದೆ:
ಸಮಸ್ಯೆಯ ಹಿನ್ನೆಲೆ :
ಕುಂಬಳೆ ಮತ್ತು ಮುಳ್ಳೇರಿಯಾವನ್ನು ಸಂಪರ್ಕಿಸುವ ಪ್ರಮುಖ ರಸ್ತೆಯಾದ ಪೆರಡಾಲ ಸೇತುವೆಯ ಪಕ್ಕದಲ್ಲಿ ಕಳೆದ ಮಳೆಗಾಲಕ್ಕೆ ಮೊದಲೇ ರಸ್ತೆಯ ಪಾರ್ಶ್ವ ಭಾಗವು ತೀವ್ರವಾಗಿ ಕುಸಿದಿತ್ತು. ಈ ರಸ್ತೆಯಲ್ಲಿ ನಿತ್ಯವೂ ನೂರಾರು ಬಸ್ಗಳು, ಖಾಸಗಿ ವಾಹನಗಳು ಹಾಗೂ ಶಾಲಾ ವಾಹನಗಳು ಸಂಚರಿಸುವುದರಿAದ, ಕುಸಿತ ಉಂಟಾದ ಜಾಗವು ಭಾರಿ ಅಪಾಯವನ್ನು ತಂದೊಡ್ಡಿತ್ತು. ರಸ್ತೆಯ ಅಗಲ ಕಿರಿದಾಗಿದ್ದರಿಂದ ರಾತ್ರಿ ವೇಳೆಯಲ್ಲಂತೂ ಸಂಚರಿಸುವುದು ಜೀವ ಕೈಯಲ್ಲಿ ಹಿಡಿದು ಸಾಗಿದಂತಾಗಿತ್ತು.
ಸ್ಥಳೀಯರ ಮನವಿಗಳಿಗೆ ಅಧಿಕಾರಿಗಳು ಸ್ಪಂದಿಸದಿದ್ದಾಗ, ವಿಜಯ ಕರ್ನಾಟಕ ಪತ್ರಿಕೆಯು ಈ ಸಮಸ್ಯೆಯ ತೀವ್ರತೆಯನ್ನು ಅರಿತು "ಸಾರ್ವಜನಿಕರ ಜೀವಕ್ಕೆ ಆಪತ್ತು ತಂದೊಡ್ಡಿರುವ ಪೆರಡಾಲ ರಸ್ತೆ ಕುಸಿತ" ಎಂಬ ಶೀರ್ಷಿಕೆಯಡಿ ಚಿತ್ರಸಹಿತ ಸವಿಸ್ತಾರವಾದ ವರದಿಯನ್ನು ಪ್ರಕಟಿಸಿತು. ರಸ್ತೆಯ ದುಃಸ್ಥಿತಿ ಹಾಗೂ ಇದರಿಂದ ಎದುರಾಗಬಹುದಾದ ದೊಡ್ಡ ಅನಾಹುತಗಳ ಬಗ್ಗೆ ಅಧಿಕಾರಿಗಳು ಮತ್ತು ಜನಪ್ರತಿನಿಧಿಗಳ ಗಮನ ಸೆಳೆಯಿತು. ಈ ನಿಟ್ಟಿನಲ್ಲಿ ಬದಿಯಡ್ಕ ಗ್ರಾಮಪಂಚಾಯಿತಿ ಅಧ್ಯಕ್ಷ ಶಂಕರ ಡಿ. ಅವರು ಕೆ.ಎಸ್.ಟಿ.ಪಿ. ವಿಭಾಗದವರನ್ನು ಸಂಪರ್ಕಿಸಿ ಕೂಡಲೇ ಅಗತ್ಯ ವ್ಯವಸ್ಥೆಯನ್ನು ಮಾಡುವಂತೆ ತಿಳಿಸಿದ್ದರು.
ರಸ್ತೆ ದುರಸ್ತಿ ಕಾರ್ಯದ ಚಾಲನೆ:
ಕುಸಿದ ಭಾಗದಲ್ಲಿ ಭದ್ರವಾದ ಗೋಡೆಯನ್ನು ಕಟ್ಟುವ ಸಲುವಾಗಿ ಕಲ್ಲು ಹಾಗೂ ಅಗತ್ಯ ವಸ್ತುಗಳನ್ನು ಜೋಡಿಸಿ ಈಗಾಗಲೇ ಕಾಮಗಾರಿ ಆರಂಭವಾಗಿದೆ. ವರ್ಷಗಳಿಂದ ನನೆಗುದಿಗೆ ಬಿದ್ದಿದ್ದ ಸಮಸ್ಯೆಗೆ ಪತ್ರಿಕಾ ವರದಿಯಿಂದಾಗಿ ಕೆಲವೇ ದಿನಗಳಲ್ಲಿ ಪರಿಹಾರ ಸಿಕ್ಕಿರುವುದರಿಂದ ಸ್ಥಳೀಯ ನಿವಾಸಿಗಳು, ವಾಹನ ಚಾಲಕರು ಹಾಗೂ ಸಾರ್ವಜನಿಕರು ವಿಶೇಷ ಕೃತಜ್ಞತೆಗಳನ್ನು ಸಲ್ಲಿಸಿದ್ದಾರೆ.